Ágætu Vopnfirðingar & aðrir velunnarar Vopnafjarðar
Gleðilegt nýtt ár & takk fyrir þetta skrýtna en að mörgu leyti góða ár 2020.
Við hér á Vopnafirði fundum ekki mikið fyrir áhrifum heimsfaraldurs miðað við marga aðra og má það kannski fyrst og fremst þakka ábyrgð og samstöðu íbúa hversu lítil áhrif heimsfaraldurinn hefur haft á okkar góða samfélag.
Fljótlega eftir fyrstu bylgju af COVID-19 fórum við að efast um að við myndum halda þorrablót 2021.
Í desember höfðu formenn samband við þorrablótsnefndina og voru allir sammála um að ekkert vit væri í að stefna á að halda blót þó svo að takmörkunum yrði aflétt fyrir þorrablótsdaginn sjálfan og okkur væri heimilt að halda blót. Þetta er nefnilega ekki búið! Við þurfum áfram að sýna ábyrgð og samstöðu.
Að því sögðu er það hér með tilkynnt að þorrablóti Vopnfirðinga 2021 er aflýst.
Kæru Vopnfirðingar!
Nýtið nýja árið í að búa til fleiri atriði fyrir okkur og við sjáumst tvíefld, í orðsins fyllstu merkingu, í janúar 2022!
Fyrir hönd Þorrablótsnefndar 2021 & 2022,
Geirmundur Vikar Jónsson & Íris Grímsdóttir.