DODICI-, nemendur í legovali í Vopnafjarðarskóla, urðu fyrir tveimur vikum First Lego League meistarar Íslands annað árið í röð og unnu sér með því inn þátttökurétt í Skandinavísku FLL úrslitakeppninni sem haldin var í Osló síðastliðinn laugardag.
Þar voru krakkarnir fulltrúar Íslands og stóðu sig með mikilli prýði. Liðið kynnti nýsköpunarverkefni sem fjallaði um orkunýtingu í Vopnafjarðarskóla. Hópurinn útskýrði einnig hönnun og forritun vélmennis sem keppt var með á þrautaborði í þremur lotum. Í vélmennakappleiknum komust krakkarnir í 8 liða úrslit (af 49 liðum sem mætt voru til keppni þennan dag) sem er frábær árangur og jöfnuðu þar með besta árangur Íslands í keppni af þessu tagi.
Hópurinn samanstendur af 7 nemendum úr 8. og 9. bekk Vopnafjarðarskóla og kennari hópsins er Sólrún Dögg Baldursdóttir, en til aðstoðar fóru að auki tveir liðsstjórar með í ferðalagið.
Að baki liggur mikil vinna við undirbúning keppninnar og skipulag ferðalagsins þar sem aðeins 10 dagar voru til stefnu eftir sigurinn á Íslandi.
Þessi ferð hefði ekki getað orðið að veruleika nema fyrir samstöðu allra þeirra sem að liðinu koma og stuðning styrktaraðila. DODICI- hópurinn er afar stoltur af árangrinum og þakkar kærlega fyrir sig!
