Jafnréttisstofa hefur veitt Vopnafjarðarhreppi heimild til að nota jafnlaunamerkið. Í því felst að staðfest er að Vopnafjarðarhreppur hafi fengið vottun á jafnlaunakerfi sínu samkvæmt jafnlaunastaðli ÍST 85:2012 og uppfylli skilyrði staðalsins.
Þar með hefur Jafnréttisstofa fengið staðfestingu á því að launaákvarðanir sveitarfélagsins séu kerfisbundnar, að fyrir hendi sé jafnlaunakerfi samkvæmt kröfum jafnlaunastaðals og að reglubundið sé fylgst með því að starfsfólk sem vinnur sömu eða jafnverðmæt störf hafi sambærileg laun óháð kynferði. Í jafnréttisáætlun Vopnafjarðarhrepps kemur fram að konum og körlum skulu greidd jöfn laun fyrir jafn verðmæt störf og skulu þau njóta sömu kjara er varða önnur starfskjör og réttindi.
Meginmarkmið jafnlaunavottunar er að vinna gegn kynbundnum launamun og stuðla að jafnrétti kynjanna á vinnumarkaði. Jafnlaunavottun var lögfest í júní 2017 með lögum nr. 56/2017 sem fela í sér breytingu á lögum um jafna stöðu og jafnan rétt kvenna og karla nr. 10/2008. Samkvæmt lögunum skal jafnlaunavottun byggjast á jafnlaunastaðlinum.
Starfsfólk Vopnafjarðarhrepps hefur unnið mikla og góða vinnu við að undirbúa sveitarfélagið fyrir jafnlaunavottunina, en sveitarfélagið naut liðsinnis Attentus – Mannauður og ráðgjöf við undirbúning og skipulag stjórnunarkerfisins. BSI group (British Standards Institution) framkvæmdi úttektir og vottaði jafnlaunakerfi sveitarfélagsins. Vinna við innleiðinguna hófst haustið 2019 og seinni úttekt fór fram 3. nóvember síðastliðinn.