Austurbrú vinnur að gerð svæðisáætlunar um meðhöndlun úrgangs á Austurlandi í samræmi við samkomulag sveitarfélaganna á Austurlandi. Austurbrú hefur stýrt verkefninu, sem hefur verið í vinnslu frá 2022. Verkefnið er liður í stefnu stjórnvalda um að þróa hringrásarhagkerfi og auka sjálfbærni í meðhöndlun úrgangs.
Svæðisáætlun er lagaskylda skv. lögum um meðhöndlun úrgangs, nr. 55/2003. Sveitarstjórn, einni eða fleiri í sameiningu, ber skv. lögunum að semja og staðfesta svæðisáætlun sem gildir fyrir viðkomandi svæði til tólf ára í senn og skal sú áætlun fylgja stefnu um meðhöndlun úrgangs og stefnu um úrgangsforvarnir.
Í svæðisáætlun eiga m.a. að koma fram upplýsingar um stöðu úrgangsmála á svæðinu, aðgerðir til að bæta endurnotkun, endurnýtingu og förgun og hvernig sveitarstjórn hyggst ná markmiðum stefnu um meðhöndlun úrgangs og stefnu um úrgangsforvarnir. Þetta felur m.a. í sér skoðun á þörf fyrir innviði fyrir meðhöndlun úrgangs á svæðinu. Að lokinni auglýsingu og kynningu áætlunarinnar skulu hlutaðeigandi sveitarstjórnir staðfesta hana og skal hún vera aðgengileg almenningi.
Tillaga að svæðisáætlun, ásamt umhverfismatsskýrslu í samræmi við III. kafla laga um umhverfismat framkvæmda og áætlana, nr. 111/2021, liggur nú fyrir og gefst almenningi sex vikna frestur til að kynna sér tillöguna og umhverfismatsskýrsluna og koma athugasemdum sínum á framfæri áður en áætlunin verður afgreidd af sveitarstjórnum Austurlands. Hægt er að kynna sér tillöguna á vef Austurbrúar, heimasíðum sveitarfélaganna og á vefsíðu Environice.
Skriflegar ábendingar og athugasemdir skulu berast í síðasta lagi 28. apríl 2025 á netfangið sara@austurbru.is eða í pósti á heimilisfangið:
Austurbrú, Vopnafirði
v/ Svæðisáætlunar um meðhöndlun úrgangs á Austurlandi
Hafnarbyggð 19
690 Vopnafirði
Tímarammi: Verkið hófst í september 2024. Verkinu lýkur með endanlegri afgreiðslu sveitastjórna Austurlands á svæðisáætluninni í maí/júní 2025.
Útgáfa: Svæðisáætlun Austurlands 2025-2035 tillaga 170325