Í dag er kynntur til leiks nýr vefur Vopnafjarðarhrepps. Lengi hefur staðið til að bæta rafræna ásýnd sveitarfélagsins og ljóst að uppfærsla væri brýn.
Undirbúningur vinnunnar hófst á vormánuðum 2019. Fljótlega var ákveðið að til að vinna við nýjan vef myndi nýtast sem best væri gott að uppfæra um leið alla grafíska ásýnd Vopnafjarðarhrepps og ráðist í mörkunarvinnu (e. branding).
Til verksins var fengin Kolofon hönnunarstofa. Þegar útbúa átti nýtt einkenni fyrir sveitarfélagið kom í ljós að byggðamerki Vopnafjarðar uppfyllti ekki kröfur sem settar eru um byggðarmerki og hlyti því ekki skráningu sem slíkt hjá Hugverkastofunni. Hér gafst því tækifæri að stíga skref til baka og hugsa alla grafíska ásýnd Vopnafjarðarhrepps upp á nýtt, þar með talið merki sveitarfélagsins.
Það er mikið gleðiefni að kynna fyrir íbúum nýjan vef og nýtt merki í dag. Ég vona að uppfærður drekinn falli vel í kram Vopnfirðinga. Vefurinn er gerður til að þjóna íbúum og gestum þeirra sem best, auka skilvirkni í stjórnsýslu, stytta boðleiðir og auðvelda störf sveitarfélagsins.
Sara Elísabet Svansdóttir, sveitarstjóri
Hér á Sara Elísabet meðal annars við að nýr vefur er þannig úr garði gerður að hann taki tillit til aðgengis fyrir alla. Þá stendur til að á allra næstu mánuðum verði tekin enn frekari skref í átt til rafrænnar stjórnsýslu þegar allar umsóknir verða gerðar rafrænar.