Fimm ungmenni úr Ungmennaráði Vopnafjarðarhrepps tóku á dögunum þátt í vinnustofu UNICEF á Íslandi ásamt ungmennaráðum Fjarðabyggðar og Múlaþings.
Um var að ræða heilsdagsvinnustofu um merkingarbæra þátttöku barna og ungmennaráða. Fyrir ungmennin voru lögð ýmis verkefni sem þau unnu, bæði skipt eftir sveitarfélögum og einnig í blönduðum hópum, varðandi barnasáttmála Sameiðuðu þjóðanna. Meðal annars var unnið með “Þátttökustiga Roger´s Hart“ og “Níu skref til merkingarbærrar þátttöku barna“. Ungmennin voru almennt mjög ánægð með vinnustofuna en hún endaði á því að þau tóku saman ráð til ráðamanna og greiddu atkvæði um það sem þeim þótti standa upp úr.
Á næstu dögum gefur UNICEF út skjal sem heitir “Ráð til ráðamanna“ en það mun innihalda ráð sem ungmennaráð um allt land hafa sett saman.
Skjal þetta verður sent ráðamönnum allra sveitarfélaga.
