Sveitarstjórn Vopnafjarðarhrepps samþykkti á sveitarstjórnarfundi í dag 18. júní að ráða Írisi Eddu Jónsdóttur í starf sveitarstjóra Vopnafjarðarhrepps.
Íris hefur starfað sem verkefnastjóri stjórnsýslu hjá Vopnafjarðarhreppi og gengt starfi sveitarstjóra frá því í febrúar síðastliðnum. Á þeim tíma hefur hún komið að fjölbreyttum verkefnum sveitarfélagsins og stýrt daglegum rekstri þess.
„Ég þakka það traust sem mér er sýnt með þessari ráðningu. Það er bæði ánægjulegt og krefjandi verkefni að leiða sveitarfélagið áfram og ég hlakka til áframhaldandi samstarfs við sveitarstjórn, starfsfólk og íbúa. Það er mikill mannauður í sveitarfélaginu og ég sé mikil tækifæri til þess að skapa sterka og sjálfbæra framtíð á Vopnafirði.“
Íris mun gegna starfi sveitarstjóra þar til hún fer í fæðingarorlof síðar á árinu. Frá 1. september mun Björn Ingimarsson taka við sem staðgengill sveitarstjóra á meðan á fæðingarorlofi stendur.
Sveitarstjórn Vopnafjarðarhrepps óskar Írisi og Birni til hamingju og hlakkar til samstarfsins.
