Í dag er sumardagurinn fyrsti. Hann er var einnig kallaður Yngismeyjardagur. Sumardagurinn fyrsti er fyrsti dagur Hörpu, sem er fyrstur af sex sumarmánuðum í gamla norræna tímatalinu.
Íslensk þjóðtrú segir að ef sumar og vetur frjósi saman boði það gott sumar, en með því er átt við að hiti fari niður fyrir frostmark aðfararnótt sumardagsins fyrsta.
Á vefsetri Í boði náttúrunnar má finna skemmtilegan fróðleik um sumargjafir:
Það er skemmtilegur siður að gefa sumargjafir á sumardaginn fyrsta og óhætt að fullyrða að slíkar gjafir kæta alla krakka. Sumargjafir hafa tíðkast hér á landi allt frá sextándu öld og þær eiga sér lengri sögu en jólagjafir. Fyrrum var til siðs að gefa börnum jafnt sem fullorðnum sumargjafir en með tíð og tíma hefur þessi siður breyst og nú til dags eru það aðallega börn sem fá sumargjafir.
Starfsfólk og sveitarstjórn Vopnafjarðarhrepps óskar öllum íbúum gleðilegs sumars og þakkar um leið fyrir veturinn.