Spá um afleitt veður í fjórðungnum er að ganga eftir. Þjóðveginum um Möðrudalsöræfi og Vopnafjarðarheiði hefur verið lokað. Vatnsskarð gæti lokast með skömmum fyrirvara. Þá er verið að loka vegarkaflanum frá Höfn að Djúpavogi sem og Breiðdalsheiði og Öxi. Vegna hvass vinds og vindstrengja á fjörðunum í kvöld og til fyrramáls mun ekkert ferðaveður verða þar á þeim tíma frekar en annarsstaðar í fjórðungnum, en gert er ráð fyrir 35 til 40 m á sek í meðalvindi og 45 til 50 metrar í hviðum, sérstaklega sunnantil. Hægara verður á austfjörðum frameftir degi en hvessir þar síðdegis og verður mjög hvasst í nótt og fram á morgun.
Aðgerðastjórn hvetur að þessu sögðu til inniveru í dag og fram til fyrramáls. Ef enn á eftir að huga að lausamunum, ruslatunnum, til að mynda, er rétt að koma þeim í skjól hið fyrsta.
Þar sem rafmagn kann að fara af meðan ofsinn gengur yfir eru viðkvæmar stofnanir og fyrirtæki beðnar um að huga að viðbrögðum vegna þess. Íbúar og hvattir til að hafa kerti og/eða vasaljós til reiðu. Fari rafmagn af mun það vonandi ekki standa lengi.
Gætum að okkur, verum heima og leggjum þannig okkar af mörkum til að aðrir geti verið það einnig.
Tilkynningar frá aðgerðastjórn verða sendar út eftir því sem veðrinu vindur fram.