Vakin er athygli á óvenjulegu veðri (miðað við árstíma) sem gengur yfir landið á morgun og þriðjudag. Gefnar hafa verið út gular og appelsínugular viðvaranir og má fylgjast með þróun þeirra hér: https://vedur.is/vidvaranir.
Gert er ráð fyrir talsverðri sjókomu hér austanlands á morgun og á þriðjudag, aðallega til fjalla. Vanbúnir bílar til „vetraraksturs“ gætu þá lent í vandræðum á fjallvegum. Þá er gert ráð fyrir talsverðri eða mikilli rigningu í kjölfar þessa sem stendur fram á miðvikudag.
Búast má við auknu afrennsli og vatnavöxtum á þriðjudag og miðvikudag sem eykur hættu á flóðum og skriðuföllum. Fólk hvatt til þess að sýna aðgát.
Sem fyrr fylgist Veðurstofa vel með mælum í hlíðum ofan Seyðisfjarðar vegna vatnavaxta og vekur athygli þyki ástæða til.
Lögregla mun setja á fésbókarsíðu sína stutta fréttatilkynningu vegna þessa þar sem íbúar og ekki síst ökumenn eru hvattir til aðgæslu. Bændur einnig beðnir um að huga að búfénaði.