Barnaheill og Geðhjálp, ásamt tónlistarmanninum Unnsteini Manúel, heimsækja Vopnafjörð mánudaginn 5. október. Heimsóknin er liður í ferð félaganna um Austfirði þar sem rætt er við ungmenni og fullorðna um líðan, samskipti og tengsl.
Á skólatíma verður haldin vinnustofa með nemendum úr efstu bekkjum grunnskólans. Þar gefst ungmennum tækifæri til að ræða sinn veruleika, reynslu og þau málefni sem standa þeim næst.
Unnið verður úr skilaboðum ungmennanna samdægurs og um kvöldið verður opinn íbúafundur í grunnskóla Vopnafjarðar kl. 19:30. Þar verða helstu niðurstöður vinnustofunnar kynntar og í kjölfarið efnt til samtals um hvernig samfélagið getur byggt áfram á sjónarmiðum og skilaboðum unga fólksins.
Íbúafundurinn er öllum opinn, en ekki er æskilegt að börn yngri en 12 ára sæki fundinn. Forsjáraðilar, sveitarstjórnarfólk og starfsfólk skóla- og frístundamála, heilbrigðis- og velferðarþjónustu og lögreglu eru sérstaklega hvött til þátttöku.
Dagskránni lýkur með stuttum tónleikum Unnsteins Manúels.
Heimsóknin til Vopnafjarðar er hluti af ferð Barnaheilla og Geðhjálpar um Austfirði dagana 5.–9. október. Auk Vopnafjarðar verður komið við á Reyðarfirði, Egilsstöðum og Höfn í Hornafirði. Verkefnið byggir á reynslu af ungmennaþingum Barnaheilla og Geðlest Geðhjálpar og er markmiðið að skapa vettvang fyrir samtal milli kynslóða um málefni sem varða ungmenni í byggðum landsins.
