Afleitu veðri er spáð á Norður- og Austurlandi á morgun og fram á mánudag.
Rauð veðurviðvörun er í gildi fyrir okkar landshluta á morgun sunnudag 9. október.
Norðvestan 15-25 m/s með mikilli rigningu eða slyddu, en snjókomu á fjallvegum.
Miklar líkur eru á að ísing setjist á raflínur og einnig eru miklar líkur á að færð spillist og ekkert ferðaveður verður á svæðinu á meðan viðvörunin er í gildi.
Gert er ráð fyrir að færð taki að spillast á fjallvegum norðaustan- og austanlands strax í fyrramálið.
Gangi spár eftir mun Vegagerðin loka Möðrudalsöræfum og öðrum fjallvegum.
Veðrið mun ganga niður þegar líður á mánudagsmorgun.
Íbúar eru hvattir til að vera ekki á ferðinni meðan veður gengur yfir, huga að lausamunum og tryggja. Búfjáreigendur beðnir um að huga að skepnum sínum vegna úrkomu og vinds.
Förum varlega, höldum okkur heima við og tryggjum þannig eigið öryggi og annarra.