Sveit­ar­stjórn

​Sveitarstjóri hefur setið hina ýmsu fundi síðustu vikur. Þar má nefna fund með Langanesbyggð vegna sameiginlegra verkefna sveitarfélaganna, fund með Svæðisskipulagsnefnd Austurlands og Almannavarnarnefnd, fund með Austurbrú vegna fræðsluáætlunar og fund með Samgöngu- og sveitarstjórnarráðherra vegna Finnafjarðar. Einnig heimsótti sveitarstjóri Sundabúð ásamst skrifstofustjóra.
Verið er að innleiða tímaskráningarkerfi fyrir starfsfólk sveitarfélagsins og verður byrjað á skrifstofunni. Einnig er verið að hefja vinnu við rafrænt umsóknarkerfi á heimasíðu sveitarfélagsins, málaskrá og stjórnendamælaborð fyrir fjárhagskerfið. Íbúð sveitarfélagsins við Þverholt 7 er komin á sölu. Fjölþjóðleg listahátið barna er að hefjast á leikskólanum. Mikil vinna hefur verið í gangi í kringum styttingu vinnuvikunnar hjá starfsfólki sveitarfélagsins og gengur sú vinna vel. Vopnafjarðarhreppur hefur tekið yfir launavinnslu slökkvi- og sjúkraflutningsstarfsfólks og er komið í samstarf við Múlaþing vegna slökkviliðs þar sem byggðasamlagið hefur verið lagt niður.
Þó nokkuð er um að vera í skipulagsmálum. Auglýsingatíma vegna Þverárvirkjunar og strengs yfir Hellisheiði er lokið og taka breytingarnar gildi í mars. Breytingartillögur vegna breytingu á aðalskipulagi vegna Ytri Hlíðar og breytingartillaga vegna deiliskipulags hafnar eru í auglýsingu núna og taka gildi í mars og apríl/maí. Verið er að skipuleggja íbúafundi í maí vegna endurskoðunar aðalskipulags og verndarsvæðis í byggð og verið er að undirbúa fýsileikakönnun vegna sundlaugarmála hjá sveitarfélaginu. Framkvæmdir hafa verið á skrifstofu, félagsmiðstöð, Sundabúð og Miklagarði og hafinn er undirbúningur vegna nýrrar útrásar í Skálanesvík. Einnig er búið að gera áætlun um framkvæmdir ársins 2021 og er vinna hafin við að setja niður göngustígaáætlun í sveitarfélaginu til næstu ára.
 ​