Sveit­ar­stjórn

​Sveitarstjóri hefur setið hina ýmsu fundi síðustu vikur. Þar má nefna stjórnarfund FFPA,  fund með almannavarnarnefnd Austurlands, kynningarfundi um styttingu vinnuvikunnar og aðalfund Minjasafnsins Bustarfelli.  Rafrænir fundir í tengslum við fjármálaráðstefnuna hafa verið alla föstudagsmorgna. Mikið hefur verið um að vera í tengslum við undirbúning jafnlaunavottunar. Seinni úttekt jafnlaunavottunar var 3.nóvember síðastliðinn og gekk mjög vel og mun Vopnafjarðarhreppur fá jafnlaunavottun í framhaldi af niðurstöðu þeirrar úttektar og getur sveitarfélagið verið stolt af því.  Ráðstefnur og aðalfundir haustsins eru að flestu leyti rafrænir í ár vegna Covid-19. Verið er að undirbúa verkefnið „Barnvænt samfélag" sem farið verður í 2021 og er verið að setja saman teymi. Einnig er verið að skoða stofnun á rafíþróttadeild í samstarfi við Einherja og verið að sækja um styrki fyrir því. Vinna vegna fjárhagsáætlunar 2021 er og hefur verið í fullum gangi og verður vinnufundur í sveitarstjórn í lok nóvember. Fyrri umræða fjárhagsáætlunar fór fram í dag og seinni umræða fer fram 10.desember. Nýbygging við Skálanesgötu er samkvæmt áætlun og er Félagsþjónustan að vinna í úthlutunum og ættu þær að liggja fyrir í þessum mánuði. Mikið er að gerast í skipulagsmálum, vinnslutillögur vegna Ytri-Hlíðar og deiliskipulags hafnar vegna niðurrifs verða kynntar á opnu húsi og auglýstar í framhaldi af því. Breyting á aðalskipulagi vegna Þverárvirkjunar og strengs yfir Hellisheiði er í auglýsingaferli núna.