Sveit­ar­stjórn

Í upphafi fundar var óskað eftir að taka inn með afbrigðum, fundargerð umhverfis- og framkvæmdaráðs nr. 27 210525 til kynningar. Borið upp til samþykktar. Samþykkt samhljóða. Til máls tekur BA. Bjartur Aðalbjörnsson leggur fram eftirfarandi bókun Vopnafjarðarlistans: Samkvæmt fundadagskrá var fundur áætlaður fimmtudaginn 15. maí kl. 14. Því hefði fundarboð ásamt fundadagskrá og fylgigögnum átt að berast hreppsnefndarfólki fyrir kl. 14 þriðjudaginn 13. maí, sem þau gerðu ekki. Rétt eftir kl. 17 fimmtudaginn 15. maí barst hreppsnefndarfólki póstur frá sveitarstjóra þess efnis að fundi sé frestað um eina viku og ákvörðun um það tekin í samráði við oddvita sveitarfélagsins. Réðst þessi seinkun af því að einn starfsmaður á skrifstofu var veikur heima. Í fyrsta lagi er það ekki sveitarstjóra, oddvita — eða sveitarfélaginu í heild — til tekna að fundadagskrá hreppsnefndar; ásamt fundarboðun, standi og falli með einum starfsmanni á skrifstofu sveitarfélagsins. Auk þess er það er hreppsnefndar sjálfrar að taka ákvarðanir um frestun funda og tilfærslu þeirra, en ekki sveitarstjóra eða oddvita sbr. 3. kafla, 8. grein samþykkta um stjórn Vopnafjarðarhrepps: Sveitarstjórn heldur reglulega fundi fjórðu hverja viku í samræmi við fundaáætlun sem sveitarstjórn samþykkir fyrir komandi ár hverju sinni. [...] Sveitarstjórn er heimilt að fella niður reglulegan fund sinn, enda sé tillaga um slíkt samþykkt mótatkvæðalaust á næsta fundi sveitarstjórnar á undan. Samkvæmt samþykktum sveitarfélagsins boðar sveitarstjóri hreppsnefndarfundi og semur hann einnig fundardagskrá í samráði við oddvita. Það er fyrir neðan allar hellur að oddviti láti það gerast á sinni vakt að ekki sé hægt að boða til fundar hreppsnefndar vegna þess að einn starfsmaður á skrifstofunni er veikur. Það ekki aðeins áfellisdómur yfir stjórnun oddvita og sveitarstjóra heldur ósanngjörn ábyrgð að setja á starfsmanninn. Að auki má vitna í 61. grein sveitarstjórnarlaga: Ársreikningur sveitarfélags skal fullgerður og samþykktur af byggðarráði eða framkvæmdastjóra sveitarfélags þar sem ekki er byggðarráð og tilbúinn til endurskoðunar og afgreiðslu í sveitarstjórn fyrir 15. apríl ár hvert. Sveitarstjórn skal hafa lokið staðfestingu ársreiknings sveitarfélags, stofnana sveitarfélags og fyrirtækja þess eigi síðar en 15. maí ár hvert. Ársreikningurinn var ekki kominn til hreppsnefndar fyrir 15. apríl og ekki samþykktur fyrir 15. maí. Það er brot á sveitarstjórnarlögum. Fulltrúar Vopnafjarðarlistans hafa margoft bent oddvita og meirihluta á brot þeirra á samþykktum sveitarfélagsins og sveitarstjórnarlögum en lítið virðist breytast. Oddviti sveitarfélagsins er ábyrgur fyrir því að fundir hreppsnefndar séu haldnir sbr. 19. grein sveitarstjórnarlaga: Oddviti stjórnar fundum sveitarstjórnar. Hann sér um að fundargerðir séu færðar og að fundir fari að öðru leyti fram í samræmi við lög, samþykktir sveitarfélagsins og almenn fundarsköp. Til máls tók AÖS. Oddviti leggur fram eftirfarandi bókun: Reglulegur fundur sveitarstjórnar sem samkvæmt samþykktri fundaáætlun átti að fara fram þann 15.maí 2025 var ekki haldinn þar sem ekki tókst að boða fundinn með tilskildum fyrirvara samkvæmt 14. gr. sveitarstjórnarlaga nr. 138/2011. Boðun fundar og dreifing gagna fórst að mestu vegna forfalla. Sveitarstjóri var þá einnig upptekin í verkefni utan skrifstofu, og barst oddvita ekki vitneskja um forföll fyrr en eftir að lögbundinn fyrirvari var liðinn. Nýr fundur var því boðaður með lögmætum hætti þann 22.maí 2025. Til máls tók BA, sveitarstjóri og BA. Bjatur Aðalbjörnsson óskar eftir 5 mínútna fundarhléi 14:10. Borið upp til samþykktar. Samþykkt samhljóða. Fundur hefst aftur 14:14. Til máls tekur BHS, BA, sveitarstjóri, AÖS og sveitarstjóri.