Sveit­ar­stjórn

Bjartur Aðalbjörnsson tók til máls og leggur fram eftirfarandi bókun: Fulltrúar Vopnafjarðarlistans gagnrýna tíðindalitla fundardagskrá hreppsnefndar en á dagskrá er eitt erindi auk fundargerða sem lagðar eru fram til kynningar. Fulltrúar Vopnafjarðarlistans fá ekki séð hvað veldur því að ekki skuli fleiri mál vera á dagskrá þar sem fyrir liggja mörg verkefni og miklar áskoranir í rekstri sveitarfélaga. Á þessum fundi ættu fjármál sveitarfélagsins að vera til sérstakrar umræðu í ljósi loðnubrests og nýgerðra kjarasamninga kennara. Þessir tveir þættir valda því að forsendur fyrir fjárhagsáætlun eru brostnar og því nauðsynlegt að endurskoða áætlunina og taka ákvarðanir um tilfærslur og forgangsröðun verkefna. Auk þessara mála eru fleiri mál sem bíða umræðu; erindi frá deildum, staða jarðhitaleitar og hafnarframkvæmdir svo eitthvað sé nefnt. Í 10. grein samþykkta um stjórn Vopnafjarðarhrepps segir: Sveitarstjóri semur dagskrá sveitarstjórnarfundar í samráði við oddvita og skal dagskráin fylgja fundarboði. Það er á ábyrgð sveitarstjóra og oddvita að fyrrnefnd mál séu tekin til umræðu í sveitarstjórn og allra gagna sé aflað sem nauðsynleg eru til umræðu í hreppsnefnd. Þá er það gagnrýnivert að oddviti sveitarfélagsins hafi ekki mætt á hreppsnefndarfund frá því um miðjan janúar. Það má túlka þessa fundardagskrá sem merki um ákveðna erindisleysu, skort á metnaði og áhugaleysi meirihlutans á stjórnun sveitarfélagsins. Í upphafi fundar var leitað afbrigða með að taka inn fundargerð menningar- og atvinnumálanefndar nr. 29. Borið upp til samþykktar. Samþykkt samhljóða.