Sveit­ar­stjórn

Fulltrúar Vopnafjarðarlistans í hreppsnefnd óska eftir skýringum og rökstuðningi vegna launa sem oddviti Vopnafjarðarhrepps fékk greidd aukalega fyrir störf sín í marsmánuði.

Spurningar Vopnafjarðarlistans eru eftirtaldar:

1. Hverjar voru heildarlaunagreiðslur frá Vopnafjarðarhreppi til oddvita fyrir störf sín í marsmánuði?

2. Af því, hver voru heildarlaun oddvita fyrir að taka að sér verkefni sveitarstjóra tímabundið? Óskað er eftir sundurliðuðu svari þar sem gert er grein fyrir grunnlaunum og fastri yfirvinnu.

3. Telur oddviti eðlilegt að slíkar greiðslur séu ekki lagðar fyrir hreppsnefnd Vopnafjarðarhrepps til samþykktar?

Að mati Vopnafjarðarlistans hefur oddviti ekki heimild til að ákvarða laun sín úr sameiginlegum sjóðum sveitarfélagsins án aðkomu hreppsnefndar.

Fulltrúar Vopnafjarðarlistans fara fram á að bréf þetta verði lagt fyrir fund hreppsnefndar,18. apríl nk. og bréfið í heild sinni bókað í fundargerð. Þá er þess óskað að skrifleg svör oddvita við ofangreindum spurningum berist fulltrúum í síðasta lagi miðvikudaginn 17. apríl og svörin í heild sinni verði bókuð undir sama lið í fundargerð.

Virðingarfyllst,

Bjartur Aðalbjörnsson

oddviti Vopnafjarðarlistans

Björn Heiðar Sigurbjörnsson

2. sæti Vopnafjarðarlistans

Hafdís Bára Óskarsdóttir

3. sæti Vopnafjarðarlistans

Svör oddvita við bréfi Vopnafjarðarlistans:

1. Hverjar voru heildarlaunagreiðslur frá Vopnafjarðarhreppi til oddvita fyrir störf sín í marsmánuði? Heildarlaunagreiðslur í mars: 1.556.101 kr fyrir skatt. Oddvitalaun féllu niður ásamt fundarsetugreiðslum í marsmánuði.

2. Af því, hver voru heildarlaun oddvita fyrir að taka að sér verkefni sveitarstjóra tímabundið? Óskað er eftir sundurliðuðu svari þar sem gert er grein fyrir grunnlaunum og fastri yfirvinnu. Staðgengilslaun samtals: 1.556.101 kr. Grunnlaun: 1.075.739 kr. Yfirvinna: 446.862 kr.

3. Telur oddviti eðlilegt að slíkar greiðslur séu ekki lagðar fyrir hreppsnefnd Vopnafjarðarhrepps til samþykktar? Á 26. fundi sveitarstjórnar 5. mars 2024 liður b. “Staðgengill sveitarstjóra var eftirfarandi bókað: “Sveitarstjórn samþykkir að oddviti taki að sér verkefni sveitarstjóra tímabundið þar til nýr einstaklingur hefur verið ráðinn í starfið. Jafnframt fer oddviti með prókúru sveitarfélagsins. Tillagan er borin upp til samþykktar. Samþykkt samhljóða.”

Til máls tók: Bjartur Aðalbjörnsson og Aðalbjörg Ósk Sigmundsdóttir.

Bjartur Aðalbjörnsson óskar eftir 10 mínútna fundarhléi kl. 15:08.

Borið upp til samþykktar. Samþykkt samhljóða.

Fundur settur á ný kl. 15:20.

Til máls tók: Hafdís Bára Óskarsdóttir og Bjartur Aðalbjörnsson.

Bjartur Aðalbjörnsson leggur fram eftirfarandi bókun Vopnafjarðarlistans: 

Á fundi hreppsnefndar þann 5. mars samþykkti hreppsnefnd að oddviti sveitarfélagsins tæki tímabundið að sér verkefni sveitarstjóra en bókunin var svohljóðandi:

Upphafleg tillaga meirihlutans var á þá leið að oddviti væri „staðgengill sveitarstjóra“ en að tillögu Bjarts Aðalbjörnssonar var orðalaginu breytt og bókunin samþykkt samhljóða. Fyrrverandi sveitarstjóri lauk störfum 8. mars.

Þann 22. mars ræddi oddviti minnihlutans, Bjartur Aðalbjörnsson, við oddvita Vopnafjarðarhrepps í síma, og miðað við það samtal var ljóst að oddviti liti á sig sem staðgengil sveitarstjóra og sagðist sjálfur eiga að fá greidd „staðgengilslaun,“ sem voru að hans mati sömu laun og fráfarandi sveitarstjóri hafði samkvæmt ráðningarsamningi. Oddviti minnihlutans gerði oddvita sveitarfélagsins grein fyrir óánægju sinni með að hann liti svo á að hann ætti að fá þessi laun greidd, enda hafði hreppsnefnd ekki samþykkt þessa launagreiðslu.

Eftir hreppsráðsfund þann 4. apríl sl. spurði oddviti minnihlutans oddvita sveitarfélagsins að því hvort eitthvað hefði verið ákveðið varðandi launagreiðslur til hins síðarnefnda, fyrir hans vinnu í marsmánuði, og sagði oddviti að það hefði verið ákveðið að hann fengi sömu laun og fyrrverandi sveitarstjóri. Spurði oddviti minnihlutans þá að því hver hefði tekið þá ákvörðun og voru svörin einfaldlega á þá leið að þetta hafi verið ákveðið í samráði við Samband íslenskra sveitarfélaga og launin væru greidd. Oddviti sveitarfélagsins taldi ekki ástæðu til að bera þessa launagreiðslu undir hreppsnefnd. Það er gott og gilt að fá ráðgjöf hjá Sambandi íslenskra sveitarfélaga en lokaákvörðun liggur alltaf hjá hreppsnefnd.

Með þessari launagreiðslu fór oddviti frjálslega með fjármuni sveitarsjóðs og hefur að mati Vopnafjarðarlistans ekki nokkra heimild til að láta greiða sjálfum sér 1.556.101 krónu í laun. Slík hegðun er ámælisverð. Þá telur Vopnafjarðarlistinn það gagnrýnisvert að oddviti skuli ekki sjálfur mæta til fundar og svara fyrir gjörðir sínar.