Sveit­ar­stjórn

Sveitarstjóri og fjármálastjóri mæltu  fyrir fjárhagsáætlun.

Lögð fram til fyrri umræðu tillaga að fjárhagsáætlun Vopnafjarðarhrepps fyrir árið 2023 ásamt þriggja ára fjárhagsáætlun fyrir árin 2024 til 2026.

Til máls tóku: Axel Örn Sveinbjörnsson, Björn Heiðar Sigurbjörnsson, Sara Elísabet Svansdóttir og Baldur Kjartansson.

Eftirfarandi tillaga liggur fyrir fundinum: Sveitarstjórn samþykkir  að vísa fjárhagsáætlun Vopnafjarðarhrepps fyrir árið 2023 og 3ja ára áætlun fyrir árin 2024 til 2026 til síðari umræðu í sveitarstjórn og samþykkir einnig að nýttar verði nýjar forsendur við gerð fjárhagsáætlunar fyrir síðari umræðu í sveitarstjórn þar sem gert er ráð fyrir 5,6% hækkun verðlags í stað 5,4% hækkunar eins og áætlun gerði ráð fyrir.

Tillagan er borin upp til samþykktar.

Samþykkt samhljóða.

Til máls tóku Bjartur Aðalbjörnsson og Axel Örn Sveinbjörnsson.

Bjartur Aðalbjörnsson óskar eftir tíu mínútna fundarhléi.

Samþykkt samhljóða.

Vopnafjarðarlistinn ítrekar þá bókun sem listinn lagði fram á hreppsráðsfundi þann 4. nóvember sl. Þar gagnrýndi listinn seinaganginn í fjárhagsáætlunarvinnunni og að ekki sé unnið innan þess tímaramma sem gefin er upp í lögum. Fyrir liggur tillaga að fjárhagsáætlun, komin frá hreppsráði til hreppsnefndar, en í henni kemur ekki fram hverjar helstu fjárfestingar og framkvæmdir verða á næstu árum. Í sveitarstjórnarlögum segir um tillögu hreppsráðs til hreppsnefndar:

Tillögunum skal fylgja lýsing helstu framkvæmda og skuldbindinga sem gert er ráð fyrir.

Vopnafjarðarlistinn er litlu nær um það á hvað Framsóknarflokkurinn ætlar að leggja áherslu í viðhaldi og framkvæmdum á Vopnafirði á næsta ári og á árunum þar á eftir. 

Í skýrslunni sem meirihlutinn leggur fram með fjárhagsáætlun eru þrjár efnisgreinar sem snúa að hugmyndum um viðhald og fjárfestingar næsta árs. Þrjár efnisgreinar sem eru nær alveg þær sömu og þær sem standa í skýrslunni frá því í nóvember 2021. Sem dæmi má nefna að þessi málsgrein stendur nákvæmlega eins í skýrslunum tveimur:

Gatnakerfið er komið á tíma og mikilvægt að skoða fyrstu skref í þeim framkvæmdum

Lítið hefur gerst í þeim málum á líðandi ári og þó er um sama flokk í meirihluta að ræða. Í báðum skýrslum má einnig finna þessa málsgrein:

Auk þess væri mikilvægt að ráðast í viðhaldsframkvæmdir í félagsheimilinu Miklagarði [...] og Sundlauginni Selárdal.

Vopnafjarðarlistinn saknar þess að meirihlutinn skuli ekki stinga út ákveðna stefnu fyrir sveitarfélagið og leggja þá stefnu fyrir hreppsnefnd.