Íslenskar þjóðsögur hafa veitt ómælda afþreyingu í gegnum aldirnar og gera enn. Smáheimar íslenskra þjóðsagna er spennandi menningarverkefni sem unnið var á Vopnafirði í vetur. Afraksturinn er 10 þrívíddarverk, smáheimar, sem sýna brot úr 10 íslenskum þjóðsögum.
Smáheimarnir voru unnir af heimafólki á Vopnafirði en verkefnastjóri er listakonan Sigrún Lára Shanko. Við gerð verkanna voru endurvinnsla og nýtni höfð að leiðarljósi. Efniviður verkanna er að mestu endurunninn eða fundinn úti í náttúrunni.
Þess má geta að enginn þátttakandi í verkefninu hafði reynslu af gerð smáheima.
Sýning á umræddum verkum verður opnuð 1. sunnudag í aðventu, 28. nóvember n.k., á annarri hæð í Kaupvangi.
Þann dag verður sýningin opin á milli klukkan 14 og 17.
Sýningin mun einnig verða opin laugardaga og sunnudaga fram til jóla á milli klukkan 14 og 17.
Á sama tíma verður opin leikfangasýning, en þar verða eingöngu til sýnis leikföng frá því fyrir árið 1964 sem eru í eigu bæjarbúa.
Allir velkomnir!
Styrktaraðilar smáheimaverkefnisins: Vopnafjarðarhreppur, SSA, Steiney og Hirðfíflin.