Samþættingu farsælda barna er skipt upp í þrjú stig. Með samræmdri stigskiptingu fæst yfirsýn yfir þjónustukerfi
og mynd af því hvernig hægt er að tryggja skilvirka og samfellda þjónustu við hæfi allra barna.
Markmiðið er að sem flest börn fái viðeigandi þjónustu á 1. stigi og að þjónusta þess stigs sé það öflug að færri börn þurfi þá umfangsmiklu þjónustu sem á sér stað á 2. og 3. stigi.
Fyrsta stigs þjónusta #fyrsta-stigs-thjonusta
Fyrsta stigs þjónusta er grunnþjónusta sem er aðgengileg öllum börnum og foreldrum. Fyrsta stig er einstaklingsbundinn og
snemmtækur stuðningur með það að markmiði að styðja við farsæld barns og koma í veg fyrir ýmiss konar erfiðleika síðar meir.
Þá er lögð áhersla á forvarnir, aðgerðir gegn ofbeldi og einelti og aðgerðir sem styðja við jákvæðan skólabrag.
Á fyrsta stigi er tekist á við vægan vanda og stuðningsaðgerðir sem koma í veg fyrir að vandinn aukist og vaxi. Þar má nefna sem dæmi námsörðugleika, hegðunarvanda barns, afleiðingar eineltis og annarra áfalla eða minniháttar heilsufars vandi.
Annars stigs þjónusta#annars-stigs-thjonusta
Á öðru stigi er veittur markvissari stuðningur en sá sem veittur er á fyrsta stigi. Til að tryggja farsæld barns eru úrræðin sérhæfðari og þjónustan fjölbreyttari. Þjónusta á öðru stigi er veitt þegar úrræði á fyrsta stigi duga ekki til eða hafa ekki borið tilætlaðan árangur. Þörfin fyrir þjónustu á öðru stigi getur til dæmis verið tilkomin af heilsufarslegum, félagslegum eða námslegum aðstæðum. Má þar nefna sem dæmi sérdeildir eða starfsbrautir í skólum og ýmsa stuðningsþjónustu á vegum félags- og skólaþjónustu.
Þriðja stigs þjónusta #thridja-stigs-thjonusta
Á þriðja stigi er veittur sérhæfðari stuðningur til að tryggja að farsæld barns verði ekki hætta búin.
Barn sem nýtur þjónustu á þessu stigi hefur að jafnaði flókinn og fjölþættan vanda og mikla umönnunarþörf. Barnið er þá í aðstæðum þar sem skortur á viðeigandi stuðningi og úrræðum getur haft alvarlegar afleiðingar og ógnað heilsu þess og þroska. Má þar nefna sem dæmi vistunarúrræði á grundvalli barnaverndarlaga, umfangsmikilnn og fjölþættan stuðning við fötluð börn og langvarandi sjúkrahúsdvöl barna.
Upplýsingarnar eru sóttar á vef farsældra barna www.farsaeldbarna.is