Chelsea er Evrópumeistari!

Fyrir þá sem fylgjast eitthvað með íþróttum vita að í gærkvöldi varð enska stórliðið Chelsea Evrópumeistari í knattspyrnu – og bætti um leið við sig einhverjum milljónum aðdáenda um heim allan. Hingað til hefur þetta sögufræga lið ekki státað af viðlíka aðdáendahópi og t. a. m. Liverpool, Arsenal og Manchester United, hvorki á Íslandi né annars staðar á jarðarkringlunni. Sigrar þess á undangengnum árum hafa þó orðið til að breyta þeirri mynd og má ætla að sama muni gerast á komandi árum varðandi ensku meistarana frá Manchester, þ. e. City.

Einherji hefur keppni

Ungmennafélagið okkar hefur keppni um helgina er liðið heldur suður og etur kappi við KH í Reykjavík en sú stóra breyting hefur verið gerð á Íslandsmótinu 3ju deildar að hún er ekki lengur svæðisskipt heldur er landið allt undir þó áfram sé leikið í nokkrum riðlum. Þannig þarf Einherji 3var suður á höfuðborgarsvæðið, sem þýðir að sjálfsögðu stóraukin útgjöld en um leið spennandi áskoranir fyrir liðið. Má gera ráð fyrir að liðin séu af nokkrum gæðum enda varalið stórliða á suð-vestur horninu, svo sem Stjörnunnar og Fjölnis til að nefna tvö lið. Rétt er að nefna að margur hugsar vel til félagsins og leggur því gott til - verður það aldrei full þakkað.

Horft til himins

Frá öndverðu má ætla að maðurinn hafi horft til himins að morgni hvers dags til að vega og meta hvernig veðrið mögulega verði þann daginn. Í mörgum tilfellum segir morgunhiminninn ekkert um hvernig dagurinn muni verða og nægir að vísa til sl. sunnudags en miðað við himinhvolfið að morgni var fátt sem benti til þess veðurs sem átti eftir að skella á okkur með nokkrum ofsa, norðanáhlaupi með snjókomu. Í öllu falli er það í eðli okkar að líta í kringum okkur og þá er himinninn ekki undanskilinn – og hvernig ætti það að vera eins afgerandi og hann er í umhverfi okkar.

Flotbryggju verksamningur undirritaður

Í gær, 15. maí, var skrifað undir verksamning milli Hafnarsjóðs Vopnafjarðar og Króla ehf., þar sem verktaki tekur að sér að framkvæma verkið „Vopnafjörður, flotbryggjur 2012”.

Eitt tilboð barst í verkið og var það frá fyrirtækinu Króla ehf. að fjárhæð 30.714.817 kr. Kostnaðaráætlun var að fjárhæð 32.195.040 kr. Tilboðið er því 95,4 % af kostnaðaráætlun. Um er því að ræða stórt verkefni á vegum sveitarfélagsins, sem bæta mun til muna aðstöðu smábátahafnar sveitarfélagsins.

Verkinu skal skila eigi síðar en 03. ágúst 2012.