Í vikunni hófst Tengir hf. handa við að leggja ljósleiðara í þéttbýli Vopnafjarðar, en ætlunin er að á næstu þremur árum verði lagður ljósleiðari til allra fyrirtækja og heimila sem eftir því óska. Í fyrsta áfanga stendur eigendum tæplega 60 fasteigna til boða að tengjast ljósleiðaranum.
Verkefnið#verkefnid
Í upphafi verkefnisins er verið að leggja stofnlögn frá aðstöðu Tengis hf. í Félagsheimilinu Miklagarði að tengibrunnum dreifbýlis Vopnafjarðar. Nauðsynlegt er að grafa rör fyrir ljósleiðara niður að stórum hluta, þar sem mikið er um aðrar lagnir á leiðinni sem þarf að þvera. Þar sem mögulegt er, verða rörin hins vegar plægð niður með stórum plóg.
Í lagnaskurði inni í þéttbýlinu verða einnig lögð rör fyrir heimtaugar ljósleiðara frá tengibrunnum og munu þau rör ná inn að fasteignum. Heimtaugarörin, sem eru 14mm að þvermáli, verða síðan plægð niður með fjarstýrðum plóg þar sem aðstæður gefa tilefni til. Vonandi verður hægt að notast við þá aðferð á sem flestum stöðum enda skilur plógfar eftir fjarstýrðan plóg eftir sig afar lítil ummerki.
Framkvæmdatími#framkvaemdatimi
Áætlaður framkvæmdatími í jarðvinnu er næstu þrjár vikur en í kjölfarið verður ljósleiðara blásið í rörin og hann svo tengdur í tengibrunnum og alveg inn að búnaði Tengis hf. Þá geta viðskiptavinir pantað flutning fyrir þjónustur sínar yfir á ljósleiðara Tengis hf. og loksins séð ljósið!