Nýtt merki Vopnafjarðarhrepps hefur nú litið dagsins ljós. Merkið er hannað á Kolofon hönnunarstofu og var samþykkt sem nýtt byggðarmerki sveitarfélagsins á fundi sveitarstjórnar í maí.
Merkið leysir af hólmi eldra merki sem má segja að hafi verið barn síns tíma. Eldra merki uppfyllti ekki kröfur Hugverkastofunnar um byggðarmerki.
Í nóvember 2019 var tilboð frá Kolofon hönnunarstofu í mörkun og nýjan vef samþykkt af sveitarstjórn og auk þess var stofunni falið að koma með tillögu að nýju byggðarmerki byggðu á sama grunni og það eldra; bláma fjallanna og hafflatarins og goðsögninni um landvættinn, drekann í Vopnafirði.
Á fundi sveitarstjórnar 20. maí 2020 var tillaga Kolofon að nýju merki samþykkt samhljóða og hún í kjölfarið send til skráningar hjá Hugverkastofunni.