Í dag 1. desember 2021 eru 30 ár síðan leikskólinn Brekkubær var vígður.
Það voru mikil og ánægjuleg viðbrigði fyrir alla aðila þann 1. desember 1991 þegar glæsilegur tveggja deilda leikskóli var vígður í húsnæði Brekkubæjar við Lónabraut 15. Þessi nýi leikskóli fékk nafnið Brekkubær, en efnt var til nafnasamkeppni fyrir vígslu hússins og var það tillaga Þorgerðar Karlsdóttur sem varð hlutskörpust í þeirri keppni.
Þann 12. ágúst 2008 var svo tekin í notkun viðbygging þar sem þriðja deildin bættist við auk starfsmannaaðstöðu.
Í dag er Brekkubær þriggja deilda leikskóli með 43 nemendur og lítur út fyrir fjölgun nemenda á næstu misserum. Leikskólinn Brekkubær býr yfir góðu starfsliði, þar sem menntunarstig telst hátt miðað við stærð leikskólans, en auk leikskólakennara og leiðbeinenda starfa þar bæði iðjuþjálfi og sérkennari.
Til hamingju með daginn Brekkubær!
Saga leikskóla á Vopnafirði#saga-leikskola-a-vopnafirdi
Í upphafi voru það kvenfélagskonur á Vopnafirði sem hófu rekstur gæsluvallar árið 1967 og var hann starfræktur í þrjá mánuði á sumrin.
Árið 1975 var formlegur leikskóli svo stofnaður og var hann til húsa í Austurborg, sal Verkalýðsfélags Vopnafjarðar í eitt ár eða til ársins 1976, en þá fluttist hann í einbýlishús að Lónabraut 19 sem Vopnafjarðarhreppur átti og var leikskólinn rekinn þar allt þar til húsnæði leikskólans Brekkubæjar var tekið í notkun þann 1.desember 1991.