Sveit­ar­stjórn

Sveitarstjórn Vopnafjarðarhrepps mótmælir þeim hugmyndum Vegagerðarinnar að fækka flugferðum til Vopnafjarðarflugvallar úr fimm í þrjár á viku. Sveitarstjórnin telur að með því sé verið að auka líkur á því að flug leggist af og þá fyrr en síðar, en flugið er einu almenningssamgöngur sem eru við byggðarlagið.

Jafnframt vill sveitarstjórn beina því til samgönguráðherra, þingmanna og annarra að nægilegt fjármagn verði tryggt til að flugþjónusta til Vopnafjarðar og Þórshafnar, og þar af leiðandi almenningssamgöngur, verði ekki skertar.

Sveitarstjórn telur að ekki sé full reynsla komin á þær breytingar sem gerðar voru í febrúar sl. og þær hafi lítið verið kynntar. Jafnframt telur sveitarstjórn áætlanir Vegagerðarinnar byggðar á gömlum og jafnvel úreltum forsendum og því er það mat hennar að gera nýja athugun á ferðaþörf og möguleikum íbúa á Norð-austurhorni landsins.

Fyrir liggur minnisblað frá Vegagerðinni um breytingar á flugi til og frá Vopnafirði og Þórshöfn vegna fyrirhugaðs útboðs á flugleiðinni Akureyri-Vopnafjörður-Þórshöfn-Akureyri, sem gert verður í haust. Í drögum að útboðslýsingu er gert ráð fyrir breytingu á flugleiðinni og í stað Akureyrar, verði beint flug til Reykjavíkur án allrar viðkomu á Akureyri. Einnig að flugferðum verði fækkað úr fimm á viku í þrjár. Áætlaður kostnaður er sá sami, en núverandi fjárveitingar veita ekki svigrúm í fleiri ferðir að sögn Vegagerðarinnar.

Ábatagreining og greining ákvörðunarstaða farþega sem Vegagerðin byggir á er m.a. byggð á skýrslu sem gefin var út árið 2014 sem aftur byggir á eldri gögnum. Forsendur hafa breyst á þessum tíma og því spurning hvort ekki hefði átt að byggja tillögugerð á nýrri forsendum.

Flugið til Vopnafjarðar er samfélaginu hér mikilvægt, þrátt fyrir bættar vegsamgöngur. Vopnfirðingar sækja flesta sína þjónustu til annarra staða eins og t.d. Akureyrar og er akstursleiðin tveir og hálfur tími yfir fjallvegi og heiðar sem veldur því að oft er ófært eða illfært yfir vetrartímann. Vopnfirðingar sækja mikið af læknisþjónustu og námi til Akureyrar sem og margvíslega aðra þjónustu. Skerðing á flugþjónustu dregur enn frekar úr því þjónustustigi hér á svæðinu.

Sveitarstjórn fer fram á að útboðinu verði frestað um eitt ár og að flugið haldist óbreytt og unnin verði betri greining á fluginu áður en svona stór ákvörðun er tekin um breytingar á því. Samþykkt samhljóða.